દેશમાં વધતી બેરોજગારી વચ્ચે યુવાનો માટે એક મોટી રાહતના સમાચાર સામે આવ્યા છે. કેન્દ્ર સરકાર દ્વારા રોજગાર વધારવાના ઉદ્દેશ્યથી EPFO ELI યોજનાને મંજૂરી આપવામાં આવી છે. 1 જુલાઈ, 2025ના રોજ કેન્દ્રીય મંત્રીમંડળે આ મહત્વાકાંક્ષી યોજનાને લીલી ઝંડી આપી હતી અને તેનો અમલ 1 ઓગસ્ટ, 2025થી શરૂ થઈ 31 જુલાઈ, 2027 સુધી ચાલુ રહેશે. EPFO ELI Scheme 2026
સરકારનું લક્ષ્ય આ યોજના દ્વારા 35 મિલિયનથી વધુ ઔપચારિક નોકરીઓનું સર્જન કરવાનો છે. આ માટે કુલ ₹99,446 કરોડનું વિશાળ બજેટ ફાળવવામાં આવ્યું છે. ખાસ કરીને પહેલી વાર નોકરીમાં જોડાતા યુવાનોને સીધી આર્થિક મદદ મળશે.
પહેલી નોકરી કરનારા યુવાનોને શું મળશે?
ELI યોજનાનો ભાગ A ખાસ કરીને તે યુવાનો માટે છે જેઓ EPFO-રજિસ્ટર્ડ કંપનીમાં પ્રથમ વખત નોકરી શરૂ કરે છે.
આ યોજના હેઠળ પાત્ર કર્મચારીઓને એક મહિનાના પગાર (મૂળભૂત પગાર + DA) જેટલી રકમ, મહત્તમ ₹15,000 સુધી, બે હપ્તામાં આપવામાં આવશે.
સહાય કેવી રીતે મળશે?
- પ્રથમ હપ્તો: 6 મહિના પૂર્ણ કર્યા બાદ ₹7,500 સુધી
- બીજો હપ્તો: 12 મહિના પૂર્ણ કર્યા બાદ અને નાણાકીય સાક્ષરતા અભ્યાસક્રમ પૂર્ણ કર્યા પછી ₹7,500 સુધી
આ સંપૂર્ણ રકમ DBT (Direct Benefit Transfer) મારફતે સીધી કર્મચારીના બેંક ખાતામાં જમા કરવામાં આવશે.
યાદ રાખવું જરૂરી છે કે માત્ર તેઓ જ પાત્ર ગણાશે જેમનો માસિક કુલ પગાર ₹1 લાખ સુધીનો છે.
EPFO ELI યોજના માટે કોણ પાત્ર છે?
ELI યોજના હેઠળ નીચેના કર્મચારીઓ લાભ લઈ શકશે:
- જેમની જોડાણ તારીખ 1 ઓગસ્ટ, 2025 થી 31 જુલાઈ, 2027 વચ્ચે છે
- જેમણે 1 ઓગસ્ટ, 2025 પહેલાં ક્યારેય EPFO અથવા એક્ઝેમ્પ્ટ ટ્રસ્ટમાં યોગદાન આપ્યું નથી
- જેમનો પહેલો PF ફાળો ઓગસ્ટ 2025 અથવા તે પછી કાપવામાં આવ્યો છે
- જેમનો માસિક પગાર ₹1,00,000 કે તેથી ઓછો છે
- EPFOના નિયમો મુજબ વય મર્યાદા 18 થી 54 વર્ષ
કોણ લાભ લઈ શકશે નહીં?
- પહેલાથી EPFOમાં નોંધાયેલા કર્મચારીઓ
- ₹1 લાખથી વધુ પગાર ધરાવતા લોકો
- સરકારી કર્મચારીઓ
- જેમનો PF ઓગસ્ટ 2025 પહેલાં જ શરૂ થયો છે
કંપનીઓને શું મળશે ફાયદો?
ELI યોજનાનો ભાગ B ખાસ કંપનીઓ માટે બનાવાયો છે. નવી ભરતીને પ્રોત્સાહન આપવા માટે સરકાર દરેક નવા કર્મચારી માટે દર મહિને ₹1,000 થી ₹3,000 સુધીની સબસિડી આપશે.
સબસિડીની અવધિ
- સામાન્ય ક્ષેત્ર માટે: 2 વર્ષ
- ઉત્પાદન (મેન્યુફેક્ચરિંગ) ક્ષેત્ર માટે: 4 વર્ષ
- શરત: કર્મચારી ઓછામાં ઓછા 6 મહિના સુધી નોકરી પર હોવો જોઈએ
ભરતીની લઘુત્તમ શરતો
- 50થી ઓછા કર્મચારીઓ ધરાવતી કંપનીઓએ ઓછામાં ઓછા 2 નવા કર્મચારીઓ રાખવા પડશે
- 50 કે તેથી વધુ કર્મચારીઓ ધરાવતી કંપનીઓએ ઓછામાં ઓછા 5 નવા કર્મચારીઓ રાખવા પડશે